Saint-Omer Biere blonde deluxe

Saint-Omer Biere blonde deluxe

近期 759阿信屋 除左零食之外，都入左唔少啤酒賣，好多都係之前係香港未見過既，我都買左一籃子不同品種同口味既黎慢慢試下，今日首先講下呢隻 Saint-Omer Biere blonde deluxe 先.

                                           Saint-Omer Biere blonde deluxe -- 好似幾好賣, 得番幾罐

罐既外觀四四正正, 有齊品牌, logo等資料性內容, 無乜特別

                                                                 多國語言成份標籤

Saint-Omer Biere blonde deluxe 呢隻啤酒原產地係法國, 法國出產紅酒就聽得多, 法國啤酒o係香港就比較少見, 由1866年始創到今日, 已經有成148年歷史, 可以賣到超過100年, 相信品質應該唔會太差掛...

好, 開黎飲下先! 倒出來後感覺唔錯, 色澤金黄, 好夠氣, 啤酒泡不多不少, 而飲落去甘甘地,感覺係偏小小苦，但又冇生力同嘉士伯咁苦澀, 啤酒入口既感覺就比較偏粗獷， 唔算滑，比較濃厚, 幾 rich, 飲完好似食左一餐香濃既晚餐咁, 唔錯唔錯~~

                                                    啤酒入面既氣援援昇起, 好有朝氣!

飲完落肚之後, 有比較飽肚既感覺, 可能佢啤酒味比較濃, 而酒醉度就幾平均, 有小小面紅, 但又未至於頭暈, 

另外呢隻啤酒既重點, 應該係性價比, 759平時街坊價賣緊 $4.50 一罐, 上次我入貨既時候正好做緊8折, 街坊價再8折只需要....$3.60一罐!!! 價錢真係超平!! 比一般大陸啤酒,獅威, 藍冰等等價錢差不多咋, 比我簡, 我就一定會簡呢隻法國啤酒咧, 唔知飲得多會唔會好似法國人咁浪漫同有型呢~~哈哈~~好, 等下次759再做8折,去大手掃貨先!!

飽肚度 : 35%
酒醉度 : 輕微至中

                                      

產品 : Sanit-Omer Biere blonde deluxe

容量 : 330ml
酒精含量: 5%
飽肚度 : 35%
酒醉度 : 輕微至中

價格 : $4.50 (8折後 $3.60)

麒麟啤酒 - 岩手県遠野產 - 一番搾

麒麟啤酒 - 岩手県遠野產 - 一番搾

自從日本麒麟入左股香港生力啤之後，麒麟o係香港多左好多動作同產品，呢個當然係好事黎， o岩曬我呢庭鍾意試新野新事物既人，呢隻一番榨既麒麟啤酒，係用日本岩手県遠野產既啤酒花來釀製，嚴格黎講唔算係最新既野, 舊年年中o係超市見過一排之後無左, o係呢個月再出現番, 而係日本, 早於2011年秋季已經開賣, 係麒麟啤酒仙台工廠於2011年311災後復產既產品，日本人既恢復能力真係好強， 311大地震令到仙台工廠既貯酒罐大部份倒塌，但經過大家既共同努力, 半年就可以再次開始恢復生產啤酒。恢復後首次生產既第一個啤酒品種就係呢隻「一番搾」!                           

                                                                      靓靓仔仔既正面

日文成份標籤

罐身既設計同印花效果相當漂亮, 尤其係上面既啤酒花, 用水墨畫既手法去表達, 活龍活現!

啤酒倒出來後,傳來淡淡既啤酒清香,真係未飲先醉, 而入口相當順喉，可能有人會覺得略甜, 但佢勝在飲落去完全冇酸味, 而味道比較中性,微甘中夾集住好香既麥味，乾杯後餘韻在喉頭不散, 囗腔存有淡淡既甘香,相當正!

而且飽肚感相當輕微, 飲多幾罐都唔怕會頂住肚腩!

                                                     一路飲,一路聞下啤酒既香氣, 爽呀!

                                                         

                                                       啤酒入面昇起的泡,好似珍珠一樣咁靓!                                                                                                        

                                          啤酒泡比較偏少.....          

產品 : 麒麟啤酒 - 岩手県遠野產 - 一番搾    

容量 : 350ml
酒精含量: 5%
飽肚度 : 15%
酒醉度 : 輕微

                                           雖然2013年限定，但2014年重賣緊……唔通產量太多......

                                          1 SET 6 罐, 特價 $49.90

                                          好漂亮!

獅威啤酒挑戰盃2014

獅威啤酒挑戰盃2014

今日行過留下士多, 見到貼左張poster， 原來 獅威贊助一年一度既啤酒挑戰盃，係3月30號又係沙田馬易舉行，自從二零零六年開始到今日已經係第八届啦， 宜家只需要買兩罐或者 兩支獅威， 就可以得到入場券兩張， 入場後中可以得到cap帽同一杯生啤， 計落真係超抵玩， 佢地應該都係希望多D人入場助威既姐，咁當然唔計你入場做善事蒲草皮啦,不過要問清楚你帮診開果開士多辨館喎，因為唔係間間有飛送！

 講番獅威啤酒， 原來佢係世界五大啤酒之一， 啤酒名skol 原本係瑞典語，意思係為你的健康著想……， 賣得最多既地方係巴西， 我諗巴西人真係當係水咁感飲， 而係香港通常紙係見到普通裝，係外國有幾十種不同口味，希望遲D有機會可以試下，香港人飲佢， 主要都係車價錢比較相宜， 味道就比較平平無奇，偏酸而帶小苦！

我手頭上班到四張飛想送比大家, 邊位如果有興趣可以 SEND EMAIL 比我!

最後，送上古惑仔神父阿叔林尚義2008聲演既廣告，雖然得兩句……另外再付上一個外國廣告，如果飲完之後可以將D煩惱冰封，又幾好喎！

獅威啤酒挑戰盃 (2008年9月21日) - 阿叔 林尚義旁白  

開場白

開場白

大家好，本人係中年大叔一名， 愛香港，愛八卦，更愛啤酒， 雖然酒量淺， 但係就好鍾意試新嘢，試不同國家， 不同牌子，不同口味 既啤酒， 所以想喺呢度，同大家分享 一下試完新野既感覺，亦都等大家無咁容易中人伏……當然，飲啤酒自然唔少得送啤酒既小食，我都會喺試完之後整返编開箱文同大家分享下，而其他有趣既啤酒知識，歷史同埋趣聞，都會慢慢同大家逐一分享，希望大家多多支持！

今日開張大吉，首先同大家八下，去年係日本爆紅既半澤直樹-界雅人， 剛剛麒麟啤酒推出新一輯廣告，咁佢作為代言人，係廣告入面， 自然沿用番半澤直樹既造型，但係表情同演出就偏向律政狂人既勁誇張feel，混合埋都幾有趣，加埋佢飲完啤酒之後既爽快樣，感覺真係頂瓜瓜！
睇完好想即刻學佢咁去買罐啤爽爽佢！咁啱我都試過呢隻麒麟，下一篇會同大家分享下飲後感！

來！乾一杯！開車前不喝，喝後不開車！

金裝Asahi SUPER DRY PREMIUM - 福山雅治代言

金裝 Asahi SUPER DRY PREMIUM - 福山雅治代言

今年2月18號，Asahi 呢個日本市佔率第一既啤酒品牌，係日本本土重新推出左呢一隻被譽為2013年既最高傑作，舊年要限量推既金裝SUPER DRY PREMIUM 啤酒，

仲搵黎靚佬福山雅志做代言人同埋拍廣告， 都好重本同好有信心下，可能因為舊年賣得唔錯，

比當初預期既目標，超出左2.7倍，總共賣出左189萬罐！

咁當然認為呢隻野今年必定會再次爆红啦！

新啤酒既賣點，自然係話自己用左國產頂級麥芽，希有既啤酒花同埋獨家既超級酵母，但我覺得呢D資料性既野，幾勁都係假，飲左入喉嚨既感覺先至係真既！

呢罐啤酒罐既外觀, 維持住日本出品既一貫漂亮華麗，手感頗特別， 有磨砂質感， 而且果個金色，清淡得來又不失高貴， 但係就冇凹凸坑紋， 感覺好多似差左D咁！
一開罐，啤酒既麥香已經撲鼻而黎，
而啤酒既色澤， 比銀罐裝既Asahi略為深小小， 而苦味適中， 比喜力呢一類既外國啤酒偏淡小小，但又比一貫日本品牌濃厚，相當順喉又易入囗，感覺好唔錯， 幾啱我口味！
而飲完成罐個肚腩都無脹住脹住, 輕帶小小微醉, 感覺舒服,應該飲多兩罐都重可以,推介！

提起福山雅治， 其實我對佢， 最有印像既劇集唔係"神探伽利略"，而係好多年前既"同一屋簷下", 劇情係關於一班無左父母既六兄弟姐妹，點樣一同努力鬥，維繫住一個家，咁多年青人，自然多意見，多沖突，當中有笑又有淚啦！而福山係入面飾演排第二既哥哥，雖然外表冷傲，其實內心火熱，關心弟妹，工作認真，其實同我真係倒模一樣，我又係排第二，又係男人，又係有個大佬，又係咁靚仔……（自我陶醉中）

另外三妹酒井法子當年真係又靚，又大方斯文，睇見大佬同二佬兩個拉鋸讓愛（因為酒井係養女 ），真係睇到你咬牙切齒！而家睇番酒井， 唉！遇人不淑，仍然喺毒海浮沉中，真係……不勝唏噓……所以毒品害人, 千萬千萬不能試呀!!

產品 : Asahi SUPER DRY PREMIUM

容量 : 350ml
酒精含量: 6%
飽肚度 : 15%
酒醉度 : 輕微

最後, 分享下靚佬福山雅治為此啤酒而拍既CM, 去片!

http://cm.asahibeer.co.jp/contents/movie/drypremium_saikoukessaku01_30/player/index.php