Suntory highball

Suntory highball

近排不停有朋友去日本旅行， 有去東京，大阪，北海道，立山黑部同埋沖繩都有， 去日本旅行又真係好難抗拒既， 而家yen又平， 日本又多好野食， D人有禮貌， 服務水平又高，所以人人都去極都唔厭！

今次有朋友買左呢罐Suntory highball比我，佢話由去年開始，日本威士忌名牌Suntory成功開拓左一種新興飲法，就係將威士己mix哩其他不同既飲品，例如加可樂，cc lemon,可爾必思(炭酸飲品)等等，等威士己更加易入囗，大受女士門既歡迎！(感覺真係有D似強國版威士忌溝綠茶同红酒溝柃檬七起……)

外觀方面，佢既設計都幾華麗同高級，睇落好似鑽石甘閃閃下，倒出黎同啤酒完全唔同，雖然好多氣，但係就完全無泡，感覺係小小威士忌加有氣礦泉水，飲落只有小小威士忌味，有D到喉唔到肺，又完全唔會有飽肚感覺，不過又唔好睇小佢喎，酒精含量有成7%架，所以飲得多就好易醉，老實講呢隻野真係唔係我囗味，氣水唔似，烈酒又唔係，最惨係冇乜味可言，下次都係試下自己用汽水溝下威士忌，應該好味好多！

產品 : Suntory highball

產地 : 日本

容量 : 330ml
酒精含量: 7%
飽肚度 : 20%
酒醉度 : 中

價格 : 300YEN

Vitals berg - Large beer origianl

Vitals berg - Large beer origianl

今日介紹既啤酒，係呢隻由西班牙入口既代表，我地既相識係由759阿信做媒人開始，等我黎深入研究下，睇下佢有冇西班牙海鮮飯咁可囗先！

首先睇下外觀先，完全係平平無奇，傳統既大logo加資料hard sell, 無乜Design可言，係D孕婦不飲酒呀，18以上才飲呀，有效期等等既logo比較有趣小小

好！倒出黎睇睇，啤酒既顏色普普通通，入口感覺唔錯，味道就同其他鬼佬啤酒差不多，偏番濃小小，而且帶小小澀，但又未至於太苦！

另外佢重有一個重點，就係非！常！平！
果日買既時候特價，只係$2.50一罐！呢個價錢真係可樂都未必買倒呀！有興趣就快D去入貨啦！ 

產品 : Vitals berg - Large beer origianl

產地 : 西班牙

容量 : 330ml
酒精含量: 4.8%
飽肚度 : 30%
酒醉度 : 低

價格 : 特價港幣 $2.50

Orion Ichiban-Sakura

Orion Ichiban-Sakura

潮流興去睇櫻花，今日介紹呢隻啤酒，係由日本沖繩黎既Orion櫻花版啤酒，呢款日本2012限定釀制既特別版，而家係各大日本超市都應該揾到了！

首先睇下外觀，個罐既印花好靚，尤其係D櫻花，跟手倒出黎，感覺幾多泡，而啤酒既顏色偏深，果然係由100%麥芽所釀製，味道頗甘，而且幾順喉，感覺同一貫日本啤酒一樣，各方面都比較平衡，但我有D奇怪，櫻花特別版不是應該有花香味的嗎？唔通係我誤會左，佢係開櫻花既期間先有得賣？

產品 : Orion Ichiban-Sakura

產地 : 日本沖繩

容量 : 350ml
酒精含量: 5%
飽肚度 : 25%
酒醉度 : 低

價格 : 特價港幣 $9.90

Hite d dry finish

Hite d dry finish

最近飲啤酒，中伏中得比較多，所以無乜心機寫blog, 不過唔緊要，正如"春嬌"話齋，人生中總會遇到幾個爛人，冇爛，又點會識得去珍惜好野呢？

今次飲左呢隻Hite D dry finish, 係朋友仔去韓國旅行時特別帶返來比我既，真係多謝哂佢，比較特別既係佢既包裝, 好似可樂咁，用左膠樽裝，容量係1000ml, 等如平時3罐罐裝左右，價錢係韓圜2000w，即係十幾蚊左右，都唔算貴, 但又唔係特別平！

                                                          硬膠既外表

                                                  背脊既產地 / 成份資料 (韓文,唔識睇...)

                                                    

呢隻韓國啤酒倒出黎差不多完全無泡(!), 入口幾乾身下，吾知呢個係咪就係佢話用左 D dry處理之後既效果呢？味道方面就帶酸，同埋小小苦，相當淡下，好似冇乜味咁，啤酒顏色好淺色，簡單D講就係有小小苦味，有汽既梳打水咁，飲左2大杯之後，都好似無乜料到咁，連我都無面红……我諗，呢隻啤酒應該幾適合豪飲牛飲，但我就麻麻地啱咧……所以, 感覺中伏.....

                                                              d by Dry Finish..............

                                                    

   

                                                       硬膠既樽蓋

                                                 樽側面既 HITE 突字

                                                                  倒出黎, 無乜泡

                                              

產品 : Hite d dry finish
產地 : 韓國

容量 : 1000ml
酒精含量: 4.8%
飽肚度 : 10%
酒醉度 : 低

價格 : 韓圜2000w (約 港幣 $14)

係韓國，G-dragon繼江南大伯psy之後，今年成為呢隻啤酒牌子既新代言人，咁呢隻啤酒係韓國既話都應該係數一數二咧，比得起咁多錢,搵明星做代言……

                                               江南大伯psy

                                        咁G-dragon當然比江南大伯有型好多啦

Triple Secret des Moines & 龜田十色果子

Triple Secret des Moines & 龜田十色果子

琴晚開左呢隻玻璃樽裝既法國啤酒黎飲，佢外型的的骰骰，都幾有型，深茶色既玻璃樽，完全睇唔清入面既內涵，一開蓋，有幾香既啤酒味，跟手倒落酒杯，嘩！D泡都好豐厚！証明佢都幾足料！但倒果陣時就要小心D，如果唔係好易攪到成杯都係泡！

                                                                           強悍既外表

            

                                                                背脊既產地 / 成份資料

                                                             圖文並茂教埋你點倒啤酒

一飲落口，唔，個味道好濃厚，好有麥香，相當甘下，但你又吾會覺得佢苦喎，另外最緊要係佢不帶酸味，我就最驚D啤酒帶酸，飲落囗怪怪地唔知點咁，而佢既甘香o係口入面都會停留一段時間，等你回味下！

                                                                     Classic 既樽蓋                                                        

                                                 

                                                         確係幾好泡, LAST得都幾耐

飲落幾happy,但飲未夠一杯，已經開始暈暈地，可能飲果陣時空肚未食野，而佢既酒精含量又比一般啤酒既5-6%多，有成8%，所以好快沖左上頭，飲完一樽差D暈低，可能我酒量的確係淺啦，但大家出街飲野就真係要小心D，空肚食早餐就無妨，空肚飲酒就真係可免則免咧！

飽肚度 : 30%

酒醉度 : 中至高

總括黎講，如果大家有要求，而又比較能夠付出多D既，就一試無妨，因為佢既價錢都唔平，平時賣緊$14.90, 就算8折完都要賣成$11.90, 比起之前介紹，同樣黎自法國既 Saint omer 要貴成$8一樽，一樽就當三罐…咁…各人有各人既口味同要求，大家可以跟番住自己既心水黎簡咧！

產品 : Triple Secret des Moines

產地 : 法國

容量 : 330ml
酒精含量: 8%
飽肚度 : 30%
酒醉度 : 中至高

價格 : $14.90 (8折後 $11.90)

龜田十色果子

另外, 飲酒當然唔少得送酒小食啦，今日介紹下呢隻我最愛既零食 - 日本黎既 "龜田十色果子"，佢一大包入面有6小包，而我鐘意佢既原因係因為佢每小包入面有成10種不同口味既零食，每種有2，3塊，小朋友就最鐘意D魚仔亁，而我就最愛佢D米果，味道又唔會太咸，味精就唔會話無既, 小小啦，我買一包 $22, 平均一小包都只係$3.70, 好過成日食花生同薯片啦, 重要好多時都賣到斷貨架！所以大家見到就最好大手入貨咧！静静雞話你話丫，呢隻零食係一田要賣成$38架……所以，大家買野真係要小心格價，做個精明既醉酒佬咧！ 

                                                               外袋包括, 入面有6小包

                                                                           內面小包

小包入有10種不同口味既零食

                                                         
                                                            最好味係綠色字既米果

Table 18 Bar & Restaurant

Table 18 Bar & Restaurant

琴日外勤收工之後, 近近地去左APM逛下, 想o係 UNIQLO 補番D底衫貨 (佢賣既底衫性價比係唔錯既), 點知我 LIKE 既顏色佢又斷碼, 唯有慳番, 跟手啤酒癮又起, 諗住去搵間 bar happy hours 下先, 但行來行去都搵唔倒, 無理由一個人戇居居去打邊爐架, 可以去迴轉壽司但D位又咁鬼窄, 飲都飲得唔暢快啦, 最後想走人之際, 撞到間 bar, o係門口又有位, 拿拿聲叫番杯生啤嘆下先, 佢地生啤就只得三數種, 我就緊係簡番隻隱陣既 - STELLA ARTOIS 啦, 唔會特別好, 但都唔會差得去邊雅馬!
                                                 
                                                   SNACK就無啦, 面包棍就有2條.....

飲落去先知自己咁口渴, 腳又倦, 坐向外面向下望, 見到人潮來來往往, 自己高高在上, 踎踎腳嘆啤酒, 感覺都幾有趣, 更慶幸自己有時間, 可以偷得浮生一下...

                                                  睇下人潮, 又睇靓女, 乜野倦意都走哂!

                                                   H&M終於落戶APM, 雖然只得半層

嘆下嘆下, 唔覺意咁就消磨左一粒鐘, 下次希望可以試下呢度既晚餐, 因為 6:00 已經聽到Waitress 覆客話爆到 8:30 先至有位, 如果唔好食, 應該唔會咁爆掛......

Table 18 Bar & Restaurant

觀塘觀塘道418號創紀之城五期(apm)UC-1號舖

Tel : 3148 9444

西式  /  西餐廳

星期日至四：11:30-00:00

星期五及六：11:30-01:00

http://www.kingparrot.com/restaurants.php?id=19

我愛，啤酒小姐 by Mui

我愛，啤酒小姐 by Mui

落酒吧自然會見過唔少promoter - 我地俗稱啤酒妹既靚女，佢地既工作自不然係推銷自己牌子既啤酒呀，同客人吹下水呀，送下禮物仔咁，咁佢地既工作情況，趣事又有冇人想知？呢本由Mui所寫既繪本 - "我愛，啤酒小姐"入面，就收錄左佢見工，入行既經歷，同係不同酒場既所見所聞，自然有你我熟悉既爭女打交呀，比人聊問價錢呀，點樣同客人講價轉酒之外，promoter 既常用術語 - 做女仔 / 飛行隊 / 戶口 / 中西式之外，重有講解下比較小人知既 - 百變制服，受傷黑點，必備武器，夜半偷食....宵夜, 飲酒小禮儀, 倒啤酒有冇泡既方法等等，最驚嚇既係竟然有酒客當面叫佢除左著住既絲襪賣比佢……書中重有好多位都幾爆笑飲啤酒趣事，而作者Mui係書中都比人感覺到都好正面 (咁promoter都係推啤酒員啫)，重話佢相當鐘意呢份工，因為辛苦番完三粒鐘後，其他既就係自由時間，鐘意做乜就做乜！明白職業無分貴賤的道理!

                                                         男人的真相..............

另外係書入面, Mui 畫既插畫都好應景，相當得意同有趣！我覺得同"謝曬皮"一樣都咁抵死啜核呀！大家如果有興趣，不妨買本書來睇下丫！

http://books.mingpao.com/cfm/bookinfo.cfm?TitleID=4008

                                                          啤酒, 酒地雞......

                                                                   "我的叫雞拍擋"

P.S. 後來係綱上搵倒,原來 啤酒小姐, 永不再見了!, 啤酒小姐已經成為一個歷史, 一個傳記.........噢, 原本希望係酒吧撞到呢位靚女既希望幻滅左添.....

Saint-Omer Biere blonde deluxe

Saint-Omer Biere blonde deluxe

近期 759阿信屋 除左零食之外，都入左唔少啤酒賣，好多都係之前係香港未見過既，我都買左一籃子不同品種同口味既黎慢慢試下，今日首先講下呢隻 Saint-Omer Biere blonde deluxe 先.

                                           Saint-Omer Biere blonde deluxe -- 好似幾好賣, 得番幾罐

罐既外觀四四正正, 有齊品牌, logo等資料性內容, 無乜特別

                                                                 多國語言成份標籤

Saint-Omer Biere blonde deluxe 呢隻啤酒原產地係法國, 法國出產紅酒就聽得多, 法國啤酒o係香港就比較少見, 由1866年始創到今日, 已經有成148年歷史, 可以賣到超過100年, 相信品質應該唔會太差掛...

好, 開黎飲下先! 倒出來後感覺唔錯, 色澤金黄, 好夠氣, 啤酒泡不多不少, 而飲落去甘甘地,感覺係偏小小苦，但又冇生力同嘉士伯咁苦澀, 啤酒入口既感覺就比較偏粗獷， 唔算滑，比較濃厚, 幾 rich, 飲完好似食左一餐香濃既晚餐咁, 唔錯唔錯~~

                                                    啤酒入面既氣援援昇起, 好有朝氣!

飲完落肚之後, 有比較飽肚既感覺, 可能佢啤酒味比較濃, 而酒醉度就幾平均, 有小小面紅, 但又未至於頭暈, 

另外呢隻啤酒既重點, 應該係性價比, 759平時街坊價賣緊 $4.50 一罐, 上次我入貨既時候正好做緊8折, 街坊價再8折只需要....$3.60一罐!!! 價錢真係超平!! 比一般大陸啤酒,獅威, 藍冰等等價錢差不多咋, 比我簡, 我就一定會簡呢隻法國啤酒咧, 唔知飲得多會唔會好似法國人咁浪漫同有型呢~~哈哈~~好, 等下次759再做8折,去大手掃貨先!!

飽肚度 : 35%
酒醉度 : 輕微至中

                                      

產品 : Sanit-Omer Biere blonde deluxe

容量 : 330ml
酒精含量: 5%
飽肚度 : 35%
酒醉度 : 輕微至中

價格 : $4.50 (8折後 $3.60)